Pag-iisang dibdib

Hupong ako karon sa dili malitok nga pagbati. Pagbati nga di mahubit sa pulong. Pagbati nga kanunayng nagasangpit sa maanindot nga bansagon sa gugma – malungtaron, putli, hamili, tim-os ug bug-os sa kasingkasing.

Mao kini ang pagbati nga kaniadto kanunay kong gipangandoy nga hipalgan, hikaplagan sa kinailadman sa dughan. Dugay ko kining gipangita. Oo, sugod pa niadtong mga panahon nga wala pa nagtagbo ang atong mga dalan. Sugod niadtong wa ko pa hingkit-i ang imong maanyag nga panagway. Ang panagway nga akong gibilaran sa di maihap nga mga kagabhion uban ang bulan ug mga bitoon. Uban ang kahayag ug kangitngit. Uban ang kainit ug katugnaw. Oo, sukad pa niadtong mipitik kining dughan samtang ikaw naga-awit sa mga alawiton nga atong gipanag-ambitan. Sa atong pagsuroysuroy taliwala sa lunhawng sagbot sa kabaw sa Freedom Park uban ang mga amorseko. Uban ang mga tapuri-salindanaw sa kahaponon o kaha ang mga alibangbang nga kanunayng nagadayeg sa bulak sa mga acacia.

Natapos na ang unang yugto sa atong mga pag-antus. Apan nasayod kita nga aduna pay daghang mga pagsulay ug kapit-us. Susama sa kinaiyahan adunay unos, hulaw, bagyo, baha. O kaha linog ug pagkagun-ob. Tungod kay kining mga butanga modangat man gyud dinhi sa atong kalibutan.

Apan bisan pa niini, padayon kita nga nagalaum. Padayon kita nga nagapakigbisog. Padayon kita nga nagahandum sa mga kagahapon. Sa mga laya nga dahon sa kagahapon. Sa mga panid sa kagahapon nga atong gisaw-an ug gibalaan. Ah! Kita nagapaabot sa bag-ong ugma. Sa bag-ong sugilanon nga atong ipanugilon unya sa atong kaliwatan. Sa kaliwatan nga unya atong hatagan sa maayong panulondon. Sa mga kabtangan nga dili mapalit sa bulawan ni salapi. Tungod kay bisan kanus-a dili gayud mapalit ang tiunay nga gugma. Ang gugmang hinungdan kun ngano kita padayon nga nagalaum.

Busa kita ania karon. Nagapadayon. Padayon nga nagalaum sa pagpanagbanag. Sa pag-abot sa bag-ong ugma. Sa pagsidlak sa bag-ong adlaw. Nga maoy nagapanamkon sa pagkatawo sa bag-ong kalibutan nga atong ginapangandoy. Ang pangandoy nga kanunayng kauban sa gugmang atong gibalaan aron molungtad hangtud sa kahangturan.